|
NWKV NOORD-KAAP DOEN GOED TEN SPYTE VAN DIE DROOGTE
Die NWKV Noord-Kaap het onlangs hul Algemene Jaarvergadering in Victoria-Wes gehou.
Fanie Dippenaar se voorsittersverslag was positief oor die drie streeksbyeenkomste wat in 2018 plaasgevind het. Die jaar het afgeskop by Oranjerivier Voere naby Prieska waar meer as 300 boere aandagtig geluister het na relevante onderwerpe en die voeraanleg, voerkrale en intensiewe boerdery besoek het. Daarna was Phillipstown aan die beurt, waar internasionale spreker Peter Ackroyd, president van die Internasionale Woltekstielorganisasie en ook aan die stuur van die Campaign for Wool, die boere toegespreek het. Die mees onlangse byeenkoms was by Fraserburg, waar Leslie Bergh van BenguFarm die sowat 50 boere ingelig het oor die gebruikersvriendelike boerderybestuursprogram. Boere is ook ’n tweedaagse aanvangskursus aangebied om die program optimaal te benut. Die alombekende Pierre Vlok van BKB het ’n interessante praatjie oor die belangrike onderwerp “Waarom is woloudit belangrik” gelewer en verantwoordelike wolproduksie by boere bepleit.
Aangesien streeksbyeenkomste meer boere op grondvlak bereik, beplan die NWKV Noord-Kaap om soortgelyke reëlings in 2019 te bewerkstellig, eerder as die hou van ’n provinsiale kongres. By hierdie streeksgeleenthede sal bestuurslede ’n nuwe applikasie (“app”) op hul slimfone kan gebruik om lede te werf en lidmaatskapvorms elektronies te behartig.
Beginnerboere en nuwe toetreders tot die bedryf (boere wat oorskakel vanaf vleis- na wolboedery), word spesiaal welkom geheet in die kringe van die NWKV Noord-Kaap met ’n geskenkpak wat bestaan uit ’n wolbesem, lengtekaartjie, wolklasstandaardeboek, pen en lisensieskyfhouer.
Die volgende persone is eenparig herverkies as leiers van die NWKV Noord-Kaap: Fanie Dippenaar as voorsitter, Pieter le Roux as visevoorsitter en Herman Hugo as ere-visevoorsitter.
Die volgende toekennings is gemaak:
Skeerselkompetisie:
• Leeuwfontein Boerdery (Noord-Kaap wenner) (nasionale derde plek))
• Kabod Boerdery (Noord-Kaap naaswenner) (nasionale vyfde plek)
Noord-Kaap meriete-sertifikate
• Pierre Vlok (BKB)
• Keith Coetzee (BKB, Williston)
• Jacques van Zyl (Zoëtis)
• Johan Botha (bestuurslid NWKV Noord-Kaap)
* Diederik Vermeulen (bestuurslid NWKV Noord-Kaap)
|
