DIE vooruitsigte vir die wolmark vir 2011/12 lyk ondanks die ekonomiese onsekerheid in die Euro-sone belowend, aldus die jongste kommoditeitsverslag van die Australian Bureau of Agricultural and Resource Economics and Sciences (Abares).
Die buro verwag dat daar op kort termyn ’n afplatting sal wees in die vraag na wolprodukte in die Organisasie vir Ekonomiese Samewerking en Ontwikkeling, wat bestaan uit die ryk nywerheidslande van die wêreld (OESO). Dit geld veral vir Amerika, Japan en Brittanje, waar voorraad moontlik in die woltekstielketting kan opbou.
Voorraadvlakke
Voorraadvlakke reg oor die wêreld is egter nog laag, terwyl wolproduksie in die belangrikste uitvoerlande na verwagting sal daal. Dit kan as teenwig vir die afname in die vraag dien.
Vraag uit China
Die enigste uitsondering is Australië, waar skaapgetalle aan die toeneem is en produksie na raming met 1% tot 355 miljoen kg sal styg. Abares grond sy positiewe vooruitskouing op die feit dat die vraag uit China na verwagting sterk sal bly, hoofsaaklik as gevolg van die verwagte groei in die binnelandse verbruik van wol.
Luidens die verslag word sowat 50% van die wol wat Australië na China uitvoer deur die binnelandse mark geabsorbeer.
Hoewel China se ekonomiese groei na verwagting ietwat kan afplat vergeleke met die vorige jaar, is die verwagting dié land se ekonomie nietemin stewige groei sal toon.
Tekstielbedryf
’n Bemoedigende teken is dat die regering steeds in die land se tekstielbedryf belê en groei in dié sektor stimuleer. China het in verlede jaar reeds begin om groot beleggings in die opgradering en uitbreiding van die tekstielbedryf te maak, wat in dié jaar voortgesit is.
Die Chinese verwerk tans 50% van alle vesels wat in die wêreld geproduseer word. Dié land het verlede jaar 450 miljoen kg wol verwerk. Dit is 42% van die wêreld se wolproduksie. Plaaslike uitvoerders wat pas ’n wolkongres in Nanjing, China, bygewoon het, sê die meeste wolverwerkers was positief oor die vooruitsigte vir dié seisoen.
Die verwagting was dat pryse wel van tyd tot tyd sal terugsak, maar dat die huidige vlakke volhoubaar is en waarskynlik verder sal styg. Dit sal egter net kan gebeur as die Europeërs ’n oplossing vir die skuldkrisis vind en die wêreld nie weer in ’n resessie verval nie.
Wisselkoerse
Die beskikbaarheid van wol en wisselkoersbewegings sal dié seisoen weer ’n belangrike rol in beweging van die wolmark speel, soos tydens die laaste paar veilings gebeur het. Die plaaslike mark het danksy die aanmerklike daling van die rand teenoor die Amerikaanse dollar die afgelope paar weke gestyg.
Die Merino-aanwyser het op die veiling van 21 September die vorige seisoen se hoogste vlak verbygesteek en nader aan die sleutelvlak van R100/kg beweeg. Die veilings is sover gekenmerk deur goeie vraag, wat ongetwyfeld aangehelp word deur die feit dat kopers nou weer na China kan uitvoer. Die eerste besendings is reeds verskeep.
In Australië het die mark die laaste paar veilings teruggesak omdat die Australiese dollar nie so skerp gedaal het nie en waarskynlik ook weens die groot aanbiedings.
Een van die treffende foto's wat in die tweede fase van die Australiese bemarkingsmaatskappy, The Woolmark Company, se veldtog gebruik gaan word om Merinowol te bevorder. In dié veldtog word beoog om ’n boodskap aan die verbruiker uit te dra dat wol lig en sag teen die vel is en die persepsie dat dit krap, te verander. Die naam van die veldtog is: "Merino. No Finer Feeling."
